Xaçmaz Regional Mədəniyyət İdarəsinin və Quba-Xaçmaz Regional Təhsil İdarəsinin birgə təşkilatçılığı ilə Siyəzən rayonunda "Heydər Əliyev Azərbaycan - Azərbaycan Heydər Əliyev" adlı konfrans keçirilib.

Konfransda Siyəzən Rayon İcra Hakimiyyətinin başçısı Novruz Novruzov, tarix elmləri doktoru Dilarə Seyidzadə, millət vəkili Sadiq Qurbanov, Xaçmaz Regional Mədəniyyət İdarəsinin rəisi vəzifəsini icra edən Fərid Musayev, Quba-Xaçmaz Regional Təhsil İdarəsinin müdiri Rüfət Hacıyev, Siyəzən və Şabran rayonlarının təhsil və mədəniyyət işçiləri, ictimaiyyət mümayəndələri iştirak ediblər.

Konfrans Azərbaycan Respublikasının suverenliyi və müstəqilliyi yolunda canlarından keçmiş qəhrəmanların və Ulu öndərin əziz xatirəsinin bir dəqiqəlik sükutla anılması və Dövlət Himninin səsləndirilməsi ilə açıq elan edilib.

Konfransda çıxış edənlər qeyd edib ki, 2023-cü il mayın 10-da Azərbaycan xalqının ümummilli lideri, müstəqil Azərbaycan dövlətinin qurucusu Heydər Əliyevin anadan olmasının 100 ili tamam olur. Bu münasibətlə silsilə tədbirlər keçirilir.

Çıxış edən natiqlər ulu öndər Heydər Əliyevin xalqımız və dövlətimiz qarşısındakı misilsiz xidmətlərindən bəhs edib. Bildirilib ki, Heydər Əliyev Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi əbədilik qazanıb.

Tədbir məktəblilər şeir kompozisiyası və incəsənət ustalarının ifaları ilə davam edib.