07.05.2025 ci il tarixində Quba-Xaçmaz Regional Mədəniyyət İdarəsinin Xaçmaz Tarix Diyarşünaslıq muzeyi,  Quba-Xaçmaz Regional Gənclər və İdman İdarəsinin Xaçmaz  rayonu üzrə sektoru, Xaçmaz rayon Nərəcan kənd tam orta məktəbinin birgə təşkilatçılığı ilə Ulu Öndər Heydər Əliyevin anadan olmasının 102-ci ildönümünə həsr olunmuş, Suverenlik və konstitusiya ili çərçivəsində

"Suveren dövlətin qurucusu, Böyük lider" adlı tədbir keçirilib.

Dövlət himninin səslənməsi və vətən uğrunda canlarından keçmiş şəhidlərin xatirəsinin bir dəqiqəlik sükutla yad edilməsi ilə başlanan tədbirdə Azərbaycan xalqının görkəmli oğlu Heydər Əliyevin həyat və fəaliyyətini əks etdirən çıxışlar səslənib.

Qeyd olunub ki, Heydər Əliyev fəaliyyəti boyu müdrik və uzaqgörən siyasəti, nadir liderlik bacarığı, yüksək iradəsi, xüsusi idarəçilik istedadı və rəhbərlik bacarığı ilə adı dünya tarixinə düşmüş görkəmli siyasi və dövlət xadimi, tarixi şəxsiyyət olmuşdur. Heydər Əliyev Azərbaycanı geridə qalmış aqrar respublikadan güclü elmi-texniki potensiala malik, dinamik inkişaf edən sənaye dövlətinə çevirmiş, onun sosial-iqtisadi və mədəni tərəqqisini təmin etmiş, milli-mənəvi dəyərlərin, adət-ənənələrin qorunması, milli elitanın formalaşdırılması, sağlam və intellektual gənc nəslin yetişdirilməsi istiqamətində misilsiz nailiyyətlər qazanmışdır. Müstəqil və suveren Azərbaycanın yeni Konstitusiyası  layihəsi də məhz Heydər Əliyevin sədrliyi ilə komissiya tərəfindən hazırlanmış və 1995-ci il noyabrın 12-də ümumxalq səsverməsində (referendumda) qəbul edilmişdir.

Tədbirdə rayon ictimaiyyətinin nümayəndələri, Xaçmaz Peşə liseyinin tələbələri, məktəblilər iştirak edib.

Tədbirdə Ulu öndərin həyat və fəaliyyətini əks etdirən videoçarx nümayiş olunub.

Məktəblilərin ifasında şerlər, təqdimatlar, mahnılar səslənib.