06 may 2025-ci il tarixində Quba-Xaçmaz Regional Mədəniyyət idarəsinin Şabran rayon Heydər Əliyev Mərkəzində ümummilli lider Heydər Əliyevin anadan olmasının 102-ci il dönümü ilə əlaqədar olaraq Şabran rayon İcra Hakimiyyətinin, Yeni Azərbaycan Partiyası Şabran rayon Təşkilatı və Şabran rayon Heydər Əliyev Mərkəzinin birgə təşkilatçılığı ilə “Vətənə, xalqa həsr edilən ömür” adlı konfrans keçirilib.

Tədbirdə Şabran rayon İcra Hakimiyyətinin başçısı Asif Hüseynov, YAP Şabran rayon Təşkilatının Sədri Mehdi Balabəyov, Millət vəkili Mahir Süleymanlı rayon idarə müəsissə təşkilatları və digər qonaqlar da iştirak ediblər.

İlk öncə Mərkəzin ekspozisiya zalında gələn qonaqlara Ulu Öndərin zəngin həyat və fəaliyyəti barədə məlumat verilib, daha sonra konfrans zalında tədbir rəsmi hissə ilə davam etdirilib. Tədbir açıq elan edilərək dövlət himni səsləndirilib.

Tədbirdə çıxış edənlər qeyd ediblər ki, Heydər Əliyev dahi şəxsiyyət, uzaqgörən lider, cəsarətli insan idi o, öz həyatını doğma xalqına həsr etmişdir. Bütün dövrlərdə Ulu öndər xalqa ləyaqətlə, sədaqətlə xidmət etmişdir. Heydər Əliyev bütün dövrlərdə xalqın dəstəyini hiss edərək Azərbaycanı inamla irəliyə aparırdı. Bütün həyatını canından artıq sevdiyi xalqına, ölkəsinə həsr etmiş bu müdrik siyasi və dövlət xadimi tariximizdə müstəqilliyimizin memarı və qurucusu kimi yer tutub. Heydər Əliyev fenomeninə məxsus iti zəka, müdriklik, uzaqgörənlik və əzmkarlıq ona əvəzsiz Ümummilli Lider mövqeyi qazandırıb.

Azərbaycan Respublikasının Prezidenti cənab İlham Əliyevin qeyd etdiyi kimi: "Heydər Əliyev bütün zamanlarda, bütün dövrlərdə Azərbaycan xalqına ləyaqətlə xidmət etmişdir. Azərbaycanın müstəqilliyinin əbədi, dönməz olmasında, iqtisadi potensialının möhkəmlənməsində, bölgədə və dünyada nüfuzunun artmasında onun müstəsna xidmətləri var. Hazırda bu siyasət davam etdirilir. Bu gün ulu Öndər Heydər Əliyev bizimlə deyil, ancaq onun siyasəti yaşayır, onun qurduğu müstəqil Azərbaycan yaşayacaqdır".

Ulu öndər Heydər Əliyevin həyat və fəaliyyətini əks etdirən videoçarx nümayiş olunub.

Sonda Millət vəkili Mahir Süleymanlı Heydər Əliyev Mərkəzinin Xatirə kitabına öz təəssüratlarını qeyd edib.