16 may 2025-ci il tarixində Quba-Xaçmaz Regional Mədəniyyət İdarəsinin Siyəzən Rayon Mədəniyyət Mərkəzində Azərbaycan Yazıçılar Birliyi və Siyəzən Rayon Mədəniyyət Mərkəzinin birgə təşkilatçılığı ilə Azərbaycan ədəbiyyatının böyük siması Cəfər Cabbarlının anadan olmasının 125-ci və türk ədəbiyyatının tanınmış nümayəndəsi, Şeyxülmühərrir Əhməd Kabaklının 100 illiyi münasibətilə Kitab təqdimatı və Mükafatlandırma mərasimi keçirilib.

Tədbirdə Siyəzən Rayon İcra Hakimiyyətinin başçısı Novruz Novruzov, Azərbaycan Yazıçılar Birliyinin sədri, Xalq yazıçısı Anar, Türk Ədəbiyyatı Vəqfinin rəhbəri, şair Sərhat Kabaklı və xanımı Yüksel Kabaklı, “Türk Ədəbiyyatı” dərgisinin baş redaktoru, yazıçı-tərcüməçi İmdat Avşar, yazıçı, ədəbiyyatşünas İsa Kocakaplan, tərcüməçi və “Türk Ədəbiyyatı” dərgisinin əməkdaşı Səadət Örmeci, “Qobustan” dərgisinin baş redaktoru, yazıçı-dramaturq Pərvin Nurəliyeva, şair-tərcüməçi Aysel Xanlarqızı, Azərbaycan Yazıçılar Birliyinin Şabran bölməsinin nümayəndələri Aydın Tağıyev və Aybəniz Əliyar, AYB üzvü, şair Nəcməddin Mürvətov və Siyəzən Rayon Mərkəzi Xəstəxanasının direktoru Nərgiz Əliyeva iştirak ediblər.

Tədbir çərçivəsində Cəfər Cabbarlı və Əhməd Kabaklıya həsr olunmuş nəşrlərin təqdimatı keçirilmiş, onların ədəbi irsinin qorunması və təbliğində göstərilən xidmətlərə görə bir sıra qələm sahibləri və mədəniyyət nümayəndələri fərqləndirilmiş və mükafatlandırılıb.

Tədbirin sonunda Azərbaycan-Türkiyə ədəbi-mədəni əlaqələrinin inkişafında göstərdikləri xidmətlərə görə qonaqlara Siyəzən Rayon İcra Hakimiyyətinin başçısı tərəfindən təşəkkürnamələr təqdim olunub.